Mujhay derya naheen likhna

Mujhay derya naheen likhna mujhay sehra naheen likhna
tasalsul say safar main hoon mujhay thehra naheen likhna

puranay raabtoon ki rakhh ab tak dil main baqi hay
mairi jalti hatheli par naya wada naheen likhna

ana say jeet kar usko agar jo main nay khoya hay
maira nooha naheen likhna maira naghma naheen likhna

bisat-e-zindagi ki aakhri sarhad peh khara hoon
mujhay fateh naheen likhna mujhay muhra naheen likhna

tumhrai aankh main gar main kabhi chup chap jal ja'on
tum apni aankhoon main laikin maira sadma naheen likhna

gawahi apnay dil say lo tumhara dil kia kehta hay
mujhay jhota naheen likhna mujhay sacha naheen likhna

main uski yaad main gum hoon k apnay aap main gum hoon
mujhay mehfil naheen likhna mujhay tanha naheen likhna

main apnay lafzon say shuhrat tumhain day jaonga ik din
mujhay mash'hoor na karna maira chercha naheen likhna

yeh na ho tum kabhi usko mitana chaho na mit'te
mujhay apna samjh laina magar apna naheen likhna

mairi aankhoon main batain hain magar chehray peh gehri chup
mairi aankhain to likh daina maira chehra naheen likhna